Fronta go

Bu txuki na fundo di nha memória

Pa gretas ki bu abri na pórus di nha paxan …

N ngispa nha rizistênsia pa bu ka atxa rezan

Más bu kirkitxa bu entra, bu kanta vitória;

Komu bu forsa é más konsentradu ki di méu,

Bu sopra di méu, bu fúlia-m el mutu lonji 
Ki mi N kai konkonhós na bu petu di brêu,

N skalâbia, N busu, karni piza, osu motxoki

Ago, korasan sta dretu ku bó dentu d'el;

Y agora? Alebu li ta ludji-ludji dentu´l mi

N bira bó, dja nu konfundi na odju d'un kalker

Ka ta sabedu si é mi o nha korpu ku bu Sprítu  ta langi-langi

Ami ki fronta go, pamodi, na nroska, bu bussu,

Bu ranha, algun kau satadja ki dexa braku...

Undi algen sta tenta entra; N ka sâbi si é kre ntxotxa

Ou si e bo ki sta dentu’l mi k’e sta na buska.

Mo n ta fazi gó, si algen ki ta odia-m sta disputa-u?

Si da-l na kabesa p'e fazi elfante riba'l kobra

E podi da-m kaketa na txon p’e kalka-m ti N prutxi
P’e faze-u saí di mi, sen nporta modi N ta fika.

Tanbé, ka pa stranha kuzas galanti di li pa dianti:

Pamodi ta ratxadu limária sem fazi kruz na txon 
Pa algen e kel mé, si tenta skapa ku kuzas di sel 
E ta fastadu di tudu ki kre lebadu, p'e fika fuliadu.

Agosto 2017

Pilonkan en kont

Pilonkan

Pilonkan, nha korasan, nha íman

Bó e nha tronku, nha ramu, nha raiz

Nha stera riba kankaran di kariz,

Nha koltxon, nha mo-di bodi ki bu ama-m!

Pilonkan, nha korasan, nha íman

Bu tem tia d’ aranha Ki ta puxa-m

Ku kasola di ilástiku bu ta stika-m suavi

Pa N bai, pa N bem, pa n dixi di navi.

Pilonkan, nha korasan, nha kavi

Bu mostra-m porta di bu alsapon

Sem skada, sem korda, sem xávi

N dixi n subi, sem lolu na águ ku sabon.

Kantu n staba riba bu kutelu ta kurti briza

Bu odja ta podu kaska banana na laxidu

Bu kalsan sapatu di nkrava kalker fuxidu

Bu fla-m pa n dixi sen medu di cai pa friza.

Entri mi ku bó, nha korasan y nha iman

Tem kola ki ta gruda-nu sima um beton

Ki ka ta dislapi pa xukalha pa kansa-m

Pamodi nos amizadi, nos amor ka ten mondon

Bus planta é delikadu

Bu copa, sombra k'e nha tetu

Bus fodjas, abanu di nha petu

Bus kutelu, ku sopru di frescura

Ku séu azul  ku sol di sekura

Penedus di urzela sima flor di kravu
Lumi’l sol pa ka kema na kutelu,

Bu tra-m di mar ta ba ta rema

Bu rasta-m ketu na areia ou na kalhau

Bu suste-m pa txeia ka rasta-m

Oras ki txuba txobi di nos séu.

Pilonkan, bu korasan, bu raiz

Ta txera senpri na nha nariz

Oras ki n ta fára bu kaminhu

Pa n txiga na bó sem tranka na spinhu

Pilonkan, bu korasan, nha origem

Bu kaminhu n ta sigui sem korta

Ku dizeju di faze fotu di imagen

Di un pasadu di sodadi ki fika na nha menti
Bu íman ta puxa-m pa serta ku porta

Pilonkan, bu korasan e nha bida

Bu poder ta orienta-m

Bu ta ivita-m poi pé na barranku

Bu ta libra-m di da testa na rotxa

Pa n ka mopi kabesa di pensante.

N kre volta pa nhas origen

Arkiteta planta di lokalizasan

Ku státua di tenpu ki ta vazan

Filizmenti senpri n obi ku bo

N ka dizorienta, inda

Pilonkan, nha korasan, nha raiz

Na nos tenpu di mininu

Nu brinka ku talu y ku kariz

Komu kabalu di Munonu

Nunka bu dexa-m kai, nen tonba

Pa n ka busu, pa n ka skalabia

Pamodi kura ta fikaba difícil

Sem remedi di farmácia

Undi moska ku se Kunfiadesa

Ta ronda txeu, txapu dja kai

ka ta dexa seka

Frida ki ofista

Undi ki bu tene verdura

Ki ta alimenta-m nha alma

Nton bo é sombra, pa mi

Nton bo é txon di nha biku

Nton bo é terra di nha mai

Ki ospra-m nhas irmons

Nha gentis tudu sta gazadjadu

Nton mi é bo, bo é mi

Sonhos da aurora

recibo Planta localizaçao Helder

Festa nho S Domingos

Prepara petu pa bu puxa subida

Pintxa kalsada di Djersalina

Ki sta prindadu na nhu S. Dimingo

Santu ki sta la brasu abertu pa da-u guarida!

Na 8 di Agostu, bu podi entra Pilonkan

Y, na kalker kaza bu podi da txupu 

bu xinta nun trupesa ô riba'l pedra txaskan

Mas bu ta fladu: txiga, txiga, ben kúme.

Mas tendu moxu, cadera ò sufa pa xinta

Si bu ka ten fita ta parse kumida pa dampa;

Bu ta volta más pizadu ku pansa xeio

Di kumida gorda ô ngispadu di fijon

Gentis di la ta longa mo pa tudu algen

Ta fla mantenha sábi, ku surrizu di alma

Si kre denti'l dianti sta kumpridu ô kaídu

Ta fikadu ku grandéza di resebi txeu  óspri.

Algen ta resebedu ku troxa ou sen troxa 

Ku kanastrinha barrotadu ô ku bolsa 

Ku kalker kuza ô mesmu ku mon ta kai

Senpri ta tratadu dretu, sen distrinsu.

Y bó ki ta fla dipôs di sábi morti e ka nada

Bu podi lofi masa ku karni na pá, sima parse 

Si kre bu fika ki nen un balon di granada

Kel sábi ki bu xinti ningen ka ta kirse 

Bai tudu anu pa bu trena na anda na subida

Na txiga na algen y na sta ku el na se stilo

Na xinta pa diskansa, na nada pa freska

Na pára pa spera, na kume ku bebi na midida!

VNK ANTOLOGIA APRESENTADA EM 1 DE AGOSTO 2017 IMAGENS

ANIVERSARIO DE 2017

Amalia na capela A SF