Pesquisar neste blogue

domingo, 27 de março de 2016

DATA DI MUDJER

DATA DI MUDJER
Ah mudjer di Kau Verdi
Oji stadu tudu ku data
Ki sta komemoradu ku pompa
Ku sirkonstânsia y algun konsênsia.
Bali pena tem 8 ku 27 di Marsu
Diskursus ta ba ta bati na tekla
Nen si e poku, ta ba ta mudadu
Mentalidadi ta ba ta mexedu.
Bali pena tem data a favor di mudjer
Pelo menus ta papiadu algu bom di mudjer
Inda ki só di boka pa fora y so n’es data,
Dja ki diskursus ta ba ta bati na tekla
Ah mudjer di Kau Verdi, bu ta vensi, spera,
Tem speransa ma un dia bu ta supera
Si ka for midjor pa bo, ta ser pa kelotu
Dun tenpu sen diferensa di tratamentu.
Ah mudjer di Kau Verdi, ten data bali
Rekonhesimentu dun data valor ki bu bali
Diskursus ku palavras ki ta muda pensamentu
Ku consênsia di trata otu sen ndjutumentu.
Data ta da volta anu ta ben, ta torna passa
Debi atxa trokadu fla ku fazi kel diferensa
Mas, xintidu na rakatxa, karkitxa ku superioridadi
Inda ta subjuga em vez di rikonhise bu kolidadi.
Poder físico ta tendo, ka ta oferesidu;
Autoridadi ta konkistadu, mas e pa rikonhisidu;
Autoridadi ta setadu, pamodi bali, sen favor
Poder, txeu bes, ta sujeta, ta humilha ku pavor.
Em vez di aspra un mudjer, amasa bu mudjer
Em vez di grita ku mudjer, susura na se obidu
Em vez di ardiga mudjer, djuda bu mudjer
A ser sima bu kre pa el ser y sta komu bu mudjer.
Amália Faustino
Praia 27 di marsu di 2016

Sem comentários:

Enviar um comentário