Pesquisar neste blogue

segunda-feira, 6 de abril de 2015

Di riba’l kutelo


Di riba’l kutelo

 

Algen di li  Na Kabu Verdi,

Senpri singra na vida ku koraji  

Na pobreza ou na rikeza

Ku toskeza ou ku fineza.

 

Odju abertu, pa riba senpri

Ou ta djobi Deus na Séu

Ou ta baskudja interesi seu

Ku subtileza ou diskaradeza...  senpri!

 

Tem uns ki ta subi sertus kau

Si kre pa monti k’e ka konxi

Si kre e pa skarpa ki ta demoli

Si kre ten prigu ki ta dadu pau!

 

Tem otus ki ta subi subida

Sem ranpa, sen degrau

Ta abri kaminhu sen spinhu

So ma dj’e dadu mó ou bengala.

 

Otu ta buâ sem aza ti sai kutelu

Di riba kutelu e ta djobi di baxu

Kada un ta parse’l pikinoti sima pinton,

Sen mai sen pai y sen protesan.

 

Ku gana prutxi-s di disprezu sen mondon

Ou gana di bua riba dês, sem condon

Pa prutxi-s ou pa sukumbi-s

Di riba e ta baza’s penedu di lansa.

 

E penedus Ki ta fri antis di piza

Ki ta speta antis di smaga

Sima boka bedju ki ta stilhasa

Sen distrinsa algén di asa.

 

Mi n ka kre subi kel monti la

Y dja n ka kre  pega algen bengala

Pa subi monti, depôs pa diskonxe-m

Ou pa n bira-l pinton ki e ta smaga.

 

Amália Faustino

1 di Abril de 2015

 

Sem comentários:

Enviar um comentário