PA KONFORTA

 

 

Nha amiga konta-m di sel

N obi, n fla-l ma ka so di sel

K’e fronta – pa nu konforta

Ku valor di vida k’inporta

Pa gardise Deus óki nu korda.

 

Sta difisil sima subi séu

En korpu y alma, la di kavi;

Konplikadu sima réu

Na difendi krimi gravi

K’ê akuzadu, sen debi.

 

Bu tem ki distora d'argun modi

Pa bu bida ka konsumidu sarodi.

 - Sima djan-djan di kutelu,

Undi bu rabida, alá-l la

Ta po-bu tranku na kanela...

Ku pé di kabra, ô ku martelu;

Nôs bida dja  podu marka

Ki nen a “laser” ka fika perdedu

 Ala'l na fundu'l spritu skrebedu 

Ki nen na purgatóri ka ta laba...

Nôs alma? Dentu di otu fitxadu.

 

Nôs bida ku bitola di atrazu

Podi fika na medida kel marka!!!

Undi Nu bai, nen si fora'l prazu

Ta badu nen s’é denti d’arka

Ou na rudumunhu’l diabu razu.

Paz ku sosegu si nu ka ten tioxi,

Flisidadi go? nu ka ta sâbi modi k’é;

Amor go? Nu t’obi ta fladu algun maré;

Kar(r)inhu go? Di netus ki sta li oxi,

Ta ronka, ta da luz sima kar di pulísia.