Moda un kometa

Desdi ki n konxe-bu
N odjá-bu moda un kometa
ku un kabesa di braza
Un barriga ngolfadu di konbustivel
Rabu fadjuda moda kafú farfadjadu
Ysempri ta korri txada, lumi ta baza
Ta sende tudu arvi, ta duspe floresta
Ta busu ladera uís, kutelu nu priti.

bu ten stranhu manobra di ntxotxa
na mei di dôs astru amigadu
 bu ta purluxa, bu ta pintxa
Ti ki un dês buâ ponta
Bu ta fiksiona apaxonadu
Pa bu sinhôra di kelotu
Ku vingansa na bu pruveitu
Sima ki universu sta na bu kumandu

Mas es mundu ka di makaku
E ki kenha ki subi mamulanu
E ta npoia ti ki e diskarapati
Ki ta npara-l e so kulangu!
Deus ta da sinal m'e ka ta durmi,
Debi li mé, paga li mé
E ka bun fazi otu u ki bu ta detesta!
É pa da Cesar só kel ki ka di Deus.

É ka bun, sinhôra di kuza ningen
Soris mal ganhadu ka ta gozadu;
Si kada un kumê ku si paduku
Si dadu passu sima cada perna
 Trankilidadi ta prinxi-l dentu
Nesisidadi ta tontoma, ta da posentu
Konfortadu, ramediadu ta fika
Na bitola, tudu ta njusta paz ki sta mesti.