Polon di dizarraska!
N fuska ma nha sa ta ba pa terra,
N rusga dispidi di nha d’es manera,
N txoma nha, nha monta moku
y nha kre sumula pa nha lolu.
N marra stangu pa N da nha fala
N sumara si dja nha ruma kel mala
Sem pasa kel pezu na kada maleta,
N ben ferferi si ta parsi un greta.
N kre pidi nha un kantinhu, favor
Pa N susui uns faísca di amor
Uns gotas di karinhu, sem cor
Gritus di sodadi la, sen rancor.
Kel óra ki avion txiga nha terra,
La di porta, nha larga-s na bentu
Kes faísca di amor ta
nasi n’un lera,
Regadu ku txuba di kes karinhu!
Ka nha tuntunhi, na leba-m es,
Mi N Ka nenhun prigu, ki fari es
Parte di mi ta bai, ta fika otu ta laska
Di li, marradu nun polon di dizarraska!
Ami N kre manda prova di kre txeu
Pa nha terra, y pa gentis xinti-m lapidu
Y malkonxedu pode ser diskonxedu
Más amor pagadu ku amor, stima é txeu.
3 de junhu 2018
Sem comentários:
Enviar um comentário