SUNHA KORDADU

Sunha kordadu

Fladu ma sunha e mintira,

Ma tem mintira ki é sonhu;

Sim! Nen tudu ki ta fladu

E sonhu ki sunhadu;

Mas ta fladu ma sunhadu;

Mintira di verdadi ki kontadu

Sem kontisi um sonhu na sonu

So pamodi dizejadu sunha'l kordadu.

De dia, oras ki n ta kotadu

Modi ki N sunhadu ku el

Ami n ta obi, kuriosa

Pamodi gana obi Kel sonhu,

Seja mintira ou verdadi;

N ta kre obi-l pa n sunha,

Kordadu ou na sonu

Ku kuza ki fladu ma sunhadu ku mi:

Kuazi senpri ta fladu m’é sonhu di amor

O ma mi e amor di un sonhu!

Si kre sonhu di mintira

N kre obi-l, pa n xinti

Kel sensasan sábi dentu’l mi

Ki mi propi n ta kre sunha-l.

Ami propi dja N kre

Ki mintira bira diseju di tem mi,

Ki sunha ku mi bira un verdadi,

ki ta insisti sima agu

ki ta bati na pedra dura ti ki fura!

N kre sin, ki N fladu amor

Mesmu ki for amor di mintirinha:

Un seta podi atinji korasan di nos dos!

Un sonhu di amor rakontadu

Forti sábi si ta rivivedu

Na un amor di sertu mé.

Amália Faustino, 2016, 4 di novembru